I
Sugbo, lalawigan sa kaliwat ni Humabon ug Lapu-lapu
Nakigharong sa daghang pagsuway
Nakigbisog sa di tiaw’ng sakripisyo
Hinungdan nga nagpabiling tis-og ug lig-on sa kanunay
Ang among pag-amoma ug pagmahal
Sa kultura nga nag-amag sa kasanag
Dinuslitan sa way paglurang nga mga pahiyom
Nianang imong kababayenhan nga hilabihan katahom
II
Sugbo, dinhi ning piniling lalawigan
Gituyo pag-ugbok ang krus nga dala ni Magellan
Gipasi-ugda sa mga prayle ang bunyag ngadto sa mga lumad
Aron mahimugso sa matag kasingkasing
Ang Kristohanong pagbati nga migiya kanato
Sa pagtoo sa Labaw’ng Makagagahom
Gipakatawo Niya ang Iyang bugtong anak nga si Hesukristo
Nga atong gisimba ug gipakabalaang bata nga si Snr. Sto. Niño
III
Sugbo, hardin ka sa nagkadaiyang mithi
Binisbisan sa among pag-alima'ng way ikatandi
Aron sa imong buhilaman manalingsing ang talagsaong hiyas
Nga nagatubo sa matag aghat ug nakigbatok sa matag hagit sa kinaiyahan
Ang mga anak mong gipadpad sa lain-laing lugar nga banyaga
Kun sa ilang pagpanimpad ania palang sila unta
Apan sa kapistahang gisaulog alang sa mga patron nga gibalaan
Mobalik ra sila gihapon aron ang paghalad ug hudyaka pagasaw-an
IV
Sugbo, yutang natawhan ni Gabriel "Flash" Elorde ug Marcelo B. Fernan
Mga anak mong garbo sa tabunong kaliwatan
Sa paugnat sa kusog si Flash Elorde hilabihan kabantog
Gipanalipdan ni Celing ang demokrasya, gipakayab ang bandila sa hustisya
Ang mga titik sa kulturanhong awit sa mga Sugbuanon
Gi-ugba ni Ben Zubiri diha sa iyang hunahunang balaknon
Aron ang mensahe sa bahanding nag-uwang sa duruha ka gugma
Magdilaab kanunay sa mga linya sa “Matud Nila”
V
Sugbo, mapagarbohong inahan sa buotang Don Sergio Osmeña
Gipasigarbo kang nagmatuto nilang Dulce, Pilar, Pilita ug Gloria Sevilla
Gipanamkon mong lantip og salabutan silang Cuenco, Rama, Rodriguez ug Sotto
Magbabalaod nga kusganong nanalipod sa tawhanong katungod
Ang maputing balas sa imong kabaybayonan
Maoy hinungdan pagdagsa sa turistang dayuhan
Malinawon ang imong kalikupan, tis-og ang imong ekonomiya
Sanglit wa ikaw hasola sa mga kaanib sa komunista
VI
Sugbo, kun ugaling sa inadlaw kong panginabuhian
Ipadpad sa halayong dapit ning mapintas nga kapalaran
Tugoti ako nga magadamggo ug mangidahay sa kanunay
Nga unta king akong galamhan monunot sa mabugnawn huyop sa hangin
Nga magsusapigad sa imong mga aping
Ayawat nalang nga imong mahanggap
Makasulod sa imong kasingkasing
Ug diha sa hilom isugid ko kanimo: Gimahal ko ikaw Sugbo.