Tunga sa gabii na dihang nanaog si Jeffrey sa multicab nga iyahang gisakyan. Giduka na siya ug nakatagpilaw sa sakyanan. Gusto na gayud niyang matulog.
Apan sa dihang padulong na siya sulod sa eskina paingon sa ilaha, usa ka pundok sa mga iro ang nisugat kaniya. Duol sa napulo ang mga dagkong iro nga nagpatunga pa gayud sa dalan.
Daan nang taslakan og iro si Jeffrey. Ug bisan wala pay gibuhat ang iro kaniya, bisan pagpaghot man lang, nawagtang na ang iyahang duka sa tumang kalisang.
"Kadagko ba aning mga iroa oy", pulong ni Jeffrey sa iyahang kaugalingon. "Ka-malas naman lamang gayud."
"Nakaadlawon-an na gani ta kay natagbaw ta og pangita sa P150 nga short sa trabahuan ug di ta papaulion hangtod dili kabayad", padayung yawyaw niya.
Naputol ang panghinuktok ni Jeffrey sa dihang niuwang ang mga iro. Nanlimbawot ang mga balahibo niya sa tangkugo.
"Unsa naman ni oy!"
Bisan kung nahadlok, nagpadayon pa gihapon si Jeffrey paglakaw pauli sa ilaha. Sa duol na siya sa sam-ang pampubliko sa ilang dapit, naaninaw niya ang usa ka anino sa unahan. Wala pa gihapon nihunong ang uwang sa mga iro. Gibati siya og dili tiaw nga kabalaka.
"Mao naman gayud kaha ni." Nagsugod na siya og pag-ampo og “Mituo Ako.”
"Naa kay para palit sigarilyo diha, migo?" sukot sa tawo nga nagtindog sa daplin. Nahuwasan si Jeffrey nga wala diay siya nag inusara ug mao kining tawhana nga tag-iya sa anino nga iyahang nakita kaganiha.
Apan sa wala madugay, ang maong paghupay nailisan gilayon og kahingawa kay basin dautang elemento kining tawhana ug basin aduna kini dili maayong tumong ug tuyo ngadto kaniya.
"Nong, na short raba ko sa trabahuan ug wala gayud ko’y kwarta. Diara'y singko pesos oh, basin kaigo na ni para panigarilyo," tubag niya nga nagkurog ang tuhod
"Singko pesos ra?!" daw sa nasuko ang maong tawo. "Pun-i sad tawon na og gamay oy!"
"Pasaylua jud ko, nong, apan mao na lamang jud ni nasobra."
"Na hala, kay wala naman gayud kahay lain, di nalang ko mamugos. Apan mag lingaw-lingaw usa ta."
Kalit gibira si Jeffrey sa maong tawo. Kusgan kini busa wala gayud nakapalag si Jeffrey. Pun-an pa nga murag bag-o nakasuyop og rugby ang maong tawo.
Gidala si Jeffrey sa usa ka mingaw ug ngitngit nga lugar diin adunay tag-as nga mga sagbot. Gipangunahan na niya nga basin ari itambog ang iyahang patay'ng lawas human kini matagud-tagod. Sa hilom nangayo na siya daan og pasaylo sa iyahang mga sala ngadto sa iyahang mga ginikanan, igsoon, higala ug labaw na sa Ginoo.
"Paghubo kay mangihi usa ko", pulong sa maong tawo kang Jeffrey una niya kini gibuhian. Bisan kun nabuhian na, wala siya kadagan gumikan sa kahadlok. Natumba siya nga walay umoy.
"Pagdali" mando sa tawo nga niatubang kaniya.
Nadugangan ang kahadlok ni Jeffrey sa dihang aduna siya'y nakita nga laing matang sa hinagiban. "Kadako!" Pulong pa niya sa iyahang kaugalingon.
Naglisod siya pagtindog apan iyaha gihapong gituman ang gisugo niini. Ug nagsugod na gayud ang kalbaryo ni Jeffrey.
Sa unahan, nagpadayon og uwang ang pipila ka iro. Giduyogan ang maong kasaba sa mga hagawhaw ug hangos samtang daw gipanamastamasan sa maong lalake ang likod nga bahin ni Jeffrey.Ug gumikan sa talagsaong kadako niini, nag ping-it si Jeffrey sa kasakit.
Pagkaugma, nanawag ang inahan ni Jeffrey sa fast food chain nga gitrabahuan niini. Gipahibawo niya ang mga kaubanan ug manager ni Jeffrey nga dili maka-trabaho ang iyahang anak gumikan kay taas kaayo ang hilanat niini. Sa pagkasayod sa inahan, gumikan lamang kini sa kalisang sa uwang sa mga iro sa ni-aging gabii.
Apan ang wala nasabti sa inahan kay ngano nga magkulob na kini maghigda karon. Ug labaw sa tanan, ngano maglisod og lakaw si Jeffrey.
Mao ba kini ang resulta sa uwang sa mga iro?