Niining bag-ong tuig,
Midan-ag sa sayong kabuntagon ang gaaginod nga mga hapak
Mga panghitabo nga sa nagmanlibukon nimong mata nakapasulirap
Di man tuyo nga kabalaka sa kaunuran apan kini mikuyanap
Kay ang mga ugmang umaabot kanimo nanikdol gapanghudlat…
Niining bag-ong tuig,
Dili gayud lalim ang pagkabuhi nga puno sa pagsuway
Hilabihan ang kasakit, diyutay ra man ang kalipay
Pagpailob nalang ug tunla ang mg biay-biay ug mga pagtamay
Kay nahikalimot sila ug panamin ug lantaw sa ilang nagkamuritsing’ dagway…
Niining bag-ong tuig,
Daghan mubabag sa agianan sa mga kahigayunan
Dili ka hatagan og puruhan sa paglambo gidinaw-an
Kay silang gakamang sa kalisod nangurog maoy mopaatubang
Bisan pa sa ilang kakuging hilabihan sila di takos ug wa’y ikasakbang…
Niining bag-ong tuig
Antosa nalang ang ilang mga sungugang mga kasikas
Nga sa imong pagbati midugmok-namastamas
Bisan unsaon mo og pagpaningkamot og ikyas
Tukbon ra gihapon sa gadilaab nila nga kamangtas…
Niining bag-ong tuig
Sa pagkab-ot sa damgo mong kalampusan sila tumang nalisang
Kay silang punay mong giuban mga tawong pit-os ang kina-adman
Mga lapok nga namilit gibitbit maoy nasilsil sa ilang alimpatakan
Kay nahadlok silang ikaw batan-ong banggiitan modumala sa kalibutan…
Niining bag-ong tuig
Unsaon naman lang kung tanang binuhat sama nila og pangisip?
Di kamaong modawat sa kapakyasang ilang naani ug nasakmit
Mga kuko sa madugtaong kamot nanggunit pagbira sa ubos mikuninit
Sa walay pagpanagana nahikalimot nga sa pagpakasala gaba manglabtik…