Sa gabiing nasulti (na gyud)
nilang Galene Sulo ug Turquoise Joaquin
ang ilang gibati para sa usa’g usa . . .
Desiree L. Balota || Talisay City
TJ:
Torch, naa ko’y kanta para nimo.
Balak nga harana.
(Kuhaon ang gitara sa sopa
Ug pinaagi sa finger picking,
Motukar og background
Para sa basahong balak).
wala na gyud mapugngi
ang gahum sa pagtik-op
atol sa gumunhap
nga namugna sa pagliti
apan sa gasa sa imong pag-abot,
nipabilin ang kahayag.
nataliwad-an man ko sa kangitngit,
dili gyud makadayon
ang makabuta nga gabii
tungod sa makanunayong bidlisiw
sa pagduyog mo’g pag-uban.
dili ko na kinahanglang hulaton
ang paghupas sa kangitngit
ug dili na sab nako tugawon
ang mga aninipot
sa ilang pagpahulay
sa mga higayong ang bulan
magpangikog nga magpakita
o ang mga daw adlaw sa kagabhion
pagapugngan sa pagsubang
kay nakaplagan ko na ang kahayag
sa pagsuga mo’g pagpabilin.
sa pagtukmod mo’g pag-abong sa kangitngit,
sa imong pagpadayon
sa maamumahon mong pagdilaab,
hingpit kong nagpasalamat nimo.
Torch:
Oy, naa ko’y tubag ana.
Ari ng gitara bi.
(Kuhaon kang TJ ang gitara
Ug pinaagi sa finger picking,
Motukar og background
Para sa instant balak).
maayo unta’g kanang imong awit
‘di lang tungod sa kawad-on
sa lamparilya, kurente, o bulan
o kaha sa nalabihan mong
paghugoy-hugoy sa mga magbabalak
nga midani nimong
pabuhian ang ginapos mong dila
sa baba ni Erato
bag-o ka mibalik sa akong kiliran.
dugay na baya kong naghunahuna
og nadayonan na ba
ang pagkagapos sa imong dila
sa kadenang gimugna sa kangitngit
sa pagbalibad sa pagdawat sa kahayag
nga maghatag og kagawasan
sa napugngang kamatngon
tungod sa paghikaw sa pagsubang.
gusto ko man nga motuo
nga tam-is ug lawom ang dili isulti
apan ikinabuhi nga gugma,
nabati kong kinahanglan kong maanad
nga taguan o tabunan
kun duna’y mas labaw nga kahayag
nga nagpasundayag kanimo.
TJ:
Ah, ngiga gud nimo, Torch.
Suga gyud ka!
Style ka’yo ka’g tubag!
Mura na kaha ta’g sila Christopher Marlowe
Ug Sir Walter Raleigh?
Torch:
OA ha.
Ingna nuon
Ako si Nasobraa’g-sensitivity-workshop
Ug ikaw si Nasobraa’g-anaesthesia!
Aynala’g ingon problemado
Ang controlling metaphor sa akong tubag.
Wa na ka’s workshop.
I-workshop kaha ta ka aron kabati ka.
Mura man ka’g gikubalan.
TJ:
Hoy, himuon pa nimong CAS Training Room
Ning Room 202 sa Gaea Dorm.
Wa ko magkinahanglan sa imong workshop, Torch.
Wa ko kubali.
Pakaaron-ingnon lang ko