Paghimugso pa lang sa bata
Gikaluhaan na kini’g dakong tanghaga
Tanghaga nga tidlom kaayo tugkaron
Kahitas-an ray nasayod sa dalan niyang latason
Dunay higayon makatuaw kita pag-ingon
Labaw ang adunahan kun sa kabos pagatandion
Ang adunahan buhong sa dayandayan
Ang kabos igo lang sa pagpailob, gimbut-an man sa kapalaran
Bisan sa samang atong makita
Ang kalainan sa lubong niadtong gitawag ni Bathala
Ang lubong sa sapi-an nangidlap ang palibot
Ang lubong sa kabus gibukotan sa bagang sagbot
Apan makatuaw ta sa daklit
Patas baya ang duha ka matang sa kinabuhi
Kay bisan sa nag-uwang nga panaglahi
May higayon man nga pantay ang atong masinati
Bisan ang labing makinaadmanon nga binuhat
May panahon man nga siya masipyat
Mao usab ang labing buringog nga huna-huna
May higayon man nga siya matukma
Sa lintunganay ang kinabuhi sama ra sa dakong dula
Adunahan ka man o timawa, kanimo aduna gayoy nagpangga
Apan kun gimbut-an man nga di mo na sila makita
Kana kun mosanong na ikaw sa tawag ni Bathala
Gumonhap man kini nga tulukibon
Kitang tanan niini gayod paingon
Sa abo inumol ang atong kinabuhi
Sa abo usab kita pauli
Ang kabus hubo man sa bulawan
Apan di hanap ang tugon sa Balaang Kasulatan
Kinsa kadtong putli og kasingkasing
ning kalibotan
Tim-os himaya ang iyang pagadulngan.