CEBU, Philippines - “Pasayloa ako Michael tungod kay dili ko mahimo ang pag-uban kanimo sa altar sa kaminyoon,” ni Jessica pa nga niwakli sa akong mga kamot. Isul-ot ko na unta sa iyang tudlo ang engagement ring nga akong regalo kaniya isip pagpangayo sa iyang kamot alang sa kaminyoon.
“Apan unsay hinungdan sa imong pagdumili kanako?” nako pang puno sa kahibulong. “Niabot na ang dugay tang gipangandoy, nakatigom na ko og dakong salapi,” dugang ko ngadto sa akong hinigugma.
“Usbon ko, pasayloa ako. Tungod kay dili na ako angay kanimo ug dili na pud ikaw ang lalaking sulod ning akong dughan,” tubag ni Jessica kanako.
“Ug si kinsang lalakiha ang gihulip mo kanako?” masuk-anon kong pulong kaniya, samtang gisulod ko na lang pagbalik sa akong bulsa ang singsing.
“Si Alex,” mubo niyang tubag.
“Unsa, si Alex?” nako pa nga daw dili makadawat sa nadungog gikan sa akong hinigugma. “Sa unsang hitaboa nga sa kadaghang lalake, si Alex pa man? Kahibawo ka ba kung unsa kasakit kining gibuhat mo kanako?” dugang ko pang pangutana kaniya.
“Dili ko buot nga pasakitan ko ikaw Michael tungod kay gihigugma ko usab ikaw,” matod pa ni Jessica nga mitutok sa akong mga mata. “Apan wala ko usab tuyoa nga makakat-on sa paghigugma sa imong higala. Siguro tungod kay anaa siya kanunay sa akong kiliran sa panahon nga nagkinahanglan kaayo ako kanimo, apan wala ka,” dugang pa ni Jessica ngari kanako.
“Salamin ka man unta sa akong mga mata Jessica, apan bildo ka man diay nga makasamad niining akong kasingkasing,” nako pa nga may pagmahay.
“Ug bisan kanus-a wala ko gayod damha nga ang suod ko ra usab nga amigo ang muonay sa paghuong sa akong hinigugma ug wala nay Jessica nga akong balikan pa.”
“Karong hingpit nga nahanaw na ako sa luna sa akong hinigugma, nahisama na ako sa usa ka gapnod nga gilutos sa pagkusokuso niining bangis nga balod sa kapalaran. Unya nakaamgo ako nga dili gayod diay kabayran og dakong salapi ang tiunay nga kalipay,” tuaw pa nako. (FREEMAN)