Ang kinabuhi sa tawo
Bililhong gasa gikan sa langit.
Gisabwag sa Kahitas-an sa nagkalain- laing dapit
Ug gitakinan og gugma aron sa
Isig ka ingon iyang ikapaambit.
ang maong pinitik dunay kinaiyang mopilit
Sa binuhat nga iyang masinati’g malambigit.
Apan kun matapos na ang tanan
Magbitbit kini’g panamilit
Kay kaluha sa kinabuhi ang taknaan
Nga padayong mosirit.
Di na gyud puydeng mohirit
Kun molukob na ang kangitngit.
Ang nahibiling mga suod sa dughan mosinggit
Sa tumang kaguol ug kapait
Ug igo na lang sila sa pagsangpit
Sa mitaliwang nahiluna sa laing dapit.
Bulawanong dalit
Nganong duna ka may kinutuban
Sama sa usa ka awit?
Hinaut nga mahaylo ka ning kalibutan
Ug lugwayan pa ang hamubo mong paghapit.