Nagpas-an ako sa nasudnong paglaom
Gikan sa nasod nga akong namat-an
Hingpit akong naulipon
Sa katilingban ako ang nag-antos.
Kining tanan usa lamang ka damgo?
Kansang ako natugaw
Sa mga hungihong sa matag habig
Ako nagsalimuang.
Mao ba kini ang dapit nga akong nahimutangan?
Sa mga baho sa ragbi ako nahipadpad
Asa naman ang mga kamot sa akong mga ginikanan?
Nga moagak kanako.
Karon, nakamata na ako
Wala ko unta gitun-as ang ilang mga pahimangno
Aron dili ako magbasol
Matawag pa ba ako nga paglaom sa katilingban?
Dili na… dili na.