MANILA, Philippines - Isang 30-anyos na overseas Filipino worker na nakatakda na sanang umuwi sa Pilipinas ang natagpuang patay matapos na umano’y magbigti sa loob mismo ng OWWA Center sa Malaysia.
Ayon sa Overseas Workers Welfare Administration, nagsasagawa na ng imbestigasyon ang Malaysian authorities hinggil sa pagkamatay ng hindi pa pinangalanang Pinay na tubong Visayas.
Ang naturang OFW ay natagpuang nakabitin sa loob ng banyo ng nasabing center at wala nang buhay.
Nabatid na dati na umanong nagtangkang magpakamatay ang nasabing Pinay dahil sa pagkakaroon ng alitan sa kanyang amo.
Ayon kay OWWA Administrator Carmelita Dimzon, bibigyan nila ng kaukulang assistance ang pamilya ng biktima kabilang na ang P220,000 death at burial benefits ng huli. Inaayos na rin ang repatriation sa mga labi nito.