MANILA, Philippines - Pinasalamatan ng North at Central Luzon Bus Operators si DOTC Secretary Mar Roxas sa maagap nitong pagkilos na suspendihin ang transaksiyon sa pagkakabenta ng expired nang 489 Pantranco franchise.
Sa kanyang thank you letter kay Roxas, sinabi ni Natividad Paras-Nisce ng Philippine Rabbit na bagama’t karaniwan lamang sa kalihim ang mabilis na aksiyon, sinabi nitong malakas ang naging dating nito sa kabuuan ng gobyerno dahil umayon ito sa good governance na gustong ipatupad ni Pangulong Aquino.
Una rito, nagawang ipagkaloob ng LTFRB sa mga kompanya ng bus ang Pantranco franchise kahit expired na ito noon pang 1993.
Gayunman, kaagad pinatigil ni Roxas ang bentahan dahil ayon mismo sa kalihim, “Lazarus franchise” na ang hawak ng nagsarang Pantranco North Express, Inc.
Sa kabila ng pagtutol ni LTFRB Chairman Jaime Jacob, inaprubahan naman ang bentahan nina board members Manuel Iway at Samuel Garcia. Kamakalawa ay nag-resign na sa puwesto si Iway.
Bukod sa Philippine Rabbit, ang liham ng pasasalamat kay Roxas ay pirmado rin ni Alexander Yague na pangulo ng Provincial Bus Operators Association of the Philippines (PBOA) at iba pang kinatawan ng mga kompanya ng bus.