MANILA, Philippines - Posible umanong napatay sa air strike o sugatang nakatakas ang wanted na si Moro Islamic Liberation Front (MILF) Commander Waning Abdusalam matapos itong mabigong matagpuan kahapon sa nakubkob na kampo ng bandidong grupo sa Sitio Talaib, Brgy. Labatan, Zamboanga Sibugay.
Sa joint press briefing ng PNP at AFP kahapon, sinabi ni AFP-Public Affairs Office Chief Col. Arnulfo Marcelo Burgos Jr., malaki ang posibilidad na nasawi sa pagkaubos ng dugo si Waning at maaring kabilang sa mga inilibing sa may 15 malalalim na hukay na natagpuan sa nakubkob na kuta.
“Waning reportedly wounded it’s probably true baka patay na siya. And because of blood stains everywhere indication matindi ang labanan dun sa area,” ani Burgos.
Si Waning ay lider ng MILF lawless group na sangkot sa kidnapping for ransom.
Nabatid na 15 pang hukay na pinaglibingan sa mga bangkay ang na tagpuan sa lugar kahapon at bilang respeto sa kultura ng mga Muslim ay hindi na niya ito ipinagalaw sa mga sundalo.
Sa kasalukuyan, 33 lawless group ang narekober ang mga bangkay sa lugar at ipinalalagay na 50 o higit pa ang nasawi sa mga kalaban habang mahigit sa 40 ang nasugatan.
Sa panig naman ni Zamboanga Police Provincial Director Chief Supt. Elpidio de Asis, posible ring nakatakas si Waning matapos hindi matagpuan sa lugar.
Kung nakapuslit ang sugatang si Waning at mga kasamahan nito ay posible umanong dumiretso ito sa Basilan o kaya naman ay sa Sulu.