MANILA, Philippines - Mistulang binalewala lamang ng Malacanang ang panawagan ni Senator Joker Arroyo na dapat ng tanggalin si Pampanga Rep. Gloria Arroyo sa watchlist ng Bureau of Immigration.
Ayon kay deputy presidential spokesperson Abigail Valte, maliwanag naman ang sinabi ng doktor ni Arroyo na si Dr. Juliet Cervantes na hindi na nito kailangan pang lumabas ng bansa upang magpagamot.
Ayon kay Valte, doktor na mismo ng dating pangulo ang nagpalabas ng medical bulletin kaya walang dahilan upang patulan pa ang isyu na paglalagay kay Arroyo sa watchlist.
Hindi naman umano kritikal ang kondisyon ni Arroyo kaya wala itong dahilan upang magpagamot pa sa ibang bansa.
Nauna rito, ipinaalala ni Sen. Arroyo ang mga pinagdaanan ni dating senator Ninoy Aquino na pinayagan ni dating pangulong Ferdinand Marcos na magpagamot sa Amerika ng magkaroon ito ng sakit sa puso.