MANILA, Philippines - Bigo ang ikalawang operasyon kay Pampanga Rep. Gloria Macapagal-Arroyo matapos na matuklasan ng mga espesyalista ng St. Luke’s Medical Center na may impeksyon ang naunang operasyon nito sa kanyang “cervical spine”.
Kinumpirma ni dating unang ginoo Atty. Mike Arroyo na hindi natapos ang “emergency surgical operation” dahil sa mas matinding panganib sa buhay ng pasyente kung itutuloy ito.
Kinakailangan pa umano na magpahinga ng hanggang tatlong linggo upang makabawi ang katawan bago isagawa ang ikatlong operasyon na magtatama sa problema nito sa gulugod.
Isinailalim kahapon dakong alas-8 ng umaga sa operasyon ang dating Pangulo makaraang madiskubre na nawala sa porma ang ikinabit na “titanium implant” sa gulugod sa may leeg nito.
Ito’y makaraang ireklamo ni Mrs. Arroyo nitong nakaraang Martes sa kanyang check-up ang pananakit at panghihina ng kapwa niya mga braso na direktang nakakonekta sa apektadong “cervical spine”.
Sa naturang “emergency reconstructive surgery, sinabi ni Dr. Juliet Cervantes na aalamin kung papalitan ang ikinabit na “titanium implant” o malalaman kung marupok na ang buto sa gulugod ng dating Pangulo na sanhi ng pagkawala sa puwesto ng implant.
Sinasabing mas delikado umano ang ikalawang operasyon na kung hindi naman maisasagawa ay maaaring magpalala sa kundisyon ni Mrs. Arroyo at magresulta sa mga kumplikasyon sa kanyang “nerves” na kumokontrol sa itaas na bahagi ng kanyang katawan.