Manila, Philippines - Nasagip ng isang kongresista at Department of Foreign Affairs (DFA) sa kamay ng sindikato ng droga sa bansang Brazil ang isang Pilipinang dating prep-school teacher.
Iniharap ni Cagayan de Oro 1st district Rep. Benjo Benaldo sa mga mamahayag ang biktimang si Edna Waga na residente din ng naturang lalawigan.
Sa pahayag ni Benaldo na aksidente niyang nasagip ang biktima habang nasa pangangalaga ng embahada sa Sao Paulo, Brazil matapos na umano’y makatakas mula sa hotel na kinalalagyan nito sa Thailand.
Ayon kay Benaldo, nakita nito si Waga na umiiyak at humihingi ng tulong na makauwi ng bansa sa takot na mabawi ng mga miyembro ng drug syndicate na pinaghihinalaang miyembro ng West African group.
Sa salaysay pa ni Waga, ikalawang linggo ng buwan ng Marso ng kasalukuyang taon nang imbitahan umano ito ng isang kaibigan na dati ring teacher na magtungo sa bansang Thailand upang magbakasyon at nang makarating sa naturang bansa ay narinig umano nito na may kausap ang kaibigan bago nagpasyang magtungo ang mga ito sa Brazil.
Dito na umano sila nanatili sa isang hotel at matapos ang ilang araw ay bigla na lamang umano itong iniwanan ng kaibigan na nagsabing may darating na tao sa nasabing hotel at may ipapadalang bagahe patungo sa China.
Subalit nanaig umano ang takot ni Waga kaya nagdesisyong umalis ng nasabing hotel at humingi ng tulong sa pulis na nagdala dito sa embahada ng Pilipinas sa Brazil.
Samantala, inihayag ni Benaldo na may 55 iba pang Filipino ang nakakulong sa piitan sa nasabing bansa na pawang may kaugnayan sa illegal na droga at patuloy na naghihintay ng parusa.