MANILA, Philippines - Simula na ngayong araw ang ‘one day early registration program’ ng Department of Education (DepEd) para sa mga batang may edad lima at anim na taon na nais i-enroll o ipasok sa mga pampublikong paaralan sa susunod pasukan o school year 2011-2012.
Ayon kay Education Secretary Armin Luistro, layunin ng maagang registration na mapaghandaan ang inaasahang madaragdag pang bilang ng mga mag-aaral na papasok mga public school sa bansa.
Ngayon pa lamang ay ipinag-utos na ni Luistro ang pagsasaayos sa mga silid aralan, upuan at mga librong gagamitin ng mga mag-aaral na papasok sa elementarya sa darating na buwan ng Hunyo.
Ang ‘one day early registration’ ay sisimulan ganap na alas-10 ng umaga ngayon araw sa Pembo Elementary School sa Makati City at sa lahat ng pampublikong elementarya sa bansa.
Anang Kalihim, nais nilang maiwasan ang mga dating nararanasang problema ng DepEd sa tuwing nagsisimula ang pasukan ng mga estudyante kaya nananawagan siya sa mga magulang na magtungo na sa mga paaralan para i-enroll ang kanilang mga anak.