MANILA, Philippines - Dagdag balakid lamang umano ang mungkahi ni Sen. Teofisto Guingona III na isailalim ang Laguna Lake Rehabilitation Project (LLRP) sa isa na namang imbestigasyon.
Kinondena ni Kilusang Lawa Kalikasan (KLK) spokesman Gil Navarro ang pagkaantala ng pagpapatupad ng proyekto na ang makikinabang naman ay milyon-milyong tao.
Kamakailan ay naghain ng magkahiwalay na liham ang mga mamamayan ng Laguna at Rizal kina Pangulong Aquino at Haring Albert II ng Belgium upang idulog ang pagpapatuloy ng P18.7-bilyong proyekto, at sinabing ito ang unang pagkakataong ang pinakamalaking lawa sa bansa ay sasailalim sa seryosong hakbang upang mapanumbalik ang kalidad ng tubig nito at makapagbuo ng “navigable channels” para sa pagbibiyahe ng mga pasahero at kalakal.
Hiniling ni Navarro kay Guingona na isaalang-alang ang mga pahayag ni Laguna Lake Development Authority (LLDA) general manager Rodrigo Cabrera kung saan sinabi nito na ang Baggerwerken Dec loedt en Zoon (BDC), ang kumpanyang Belgian na nagsagawa ng masusing scientific study sa lawa at nagmungkahi ng rehabilitasyon, ay handang makipag-usap ukol sa ilang pagbabago sa proyekto.
Binigyang diin niya na ang BDC ay may sapat na teknolohiya at 100 taon ng pagkadalubhasa sa dredging, at idinagdag na ang paghukay sa Ilog Pasig ay natapos ng dalawang buwan una sa itinakdang panahon.