MANILA, Philippines - Bilang pagkilala sa kanilang mga naibigay na kontribusyon sa kanilang komunidad ay pamumunuan ng mga senior citizen ang Caloocan City Hall kung saan ay isang linggong magiging department heads ang mga ito.
Ayon kay Caloocan City Mayor Enrico “Recom” Echiverri, taon-taon ay binibigyan ng lokal na pamahalaan ng pagkilala ang mga senior citizen kung saan ay gagampanan ng mga ito ang tungkulin ng mga elective at appointed officials sa buong lungsod.
Noong Lunes (October 4, 2010) ay sinimulan ang programa para sa mga senior citizen sa pamamagitan ng flag raising at turn-over ceremonies sa Bulwagang Katipunan na dinaluhan ng mga opsiyal at empleyado ng city hall.
Isa-isa ring itinuro sa mga napiling senior citizen ang mga tungkulin ng bawat departamento na kanilang hahawakan sa loob ng isang linggo na magtatapos sa Biyernes, October 8.
Matapos ang isang linggong paghawak sa mga naibigay na tungkulin sa bawat departamento ay makatatanggap ng simpleng regalo ang mga senior citizen bilang pagkilala sa naibahagi ng mga ito.