MANILA, Philippines - Hihilingin ni Supreme Court (SC) Chief Justice Renato Corona sa Commission on Elections (Comelec) na ma-exempt ang mga huwes at mahistrado sa ipinapatupad na gun ban bilang paghahanda sa nalalapit na barangay at Sangguniang Kabataan elections.
Ang kahilingan ay bunsod na rin ng pagkakapaslang kay Presiding Judge Reynaldo Lacasandile ng Vigan City, Ilocos Sur Regional Trial Court Branch 20.
Ito na umano ang pangalawang pagkakataon na ang isang walang kalaban-laban na huwes ay patayin habang ipinapatupad ang gun ban.
Si Lacasandile ang ikalawang miyembro ng hudikatura na napatay sa hilagang Luzon at siya rin ang ika-21 judge na nasawi simula noong 1999.
Noong nakalipas na buwan ng Mayo ay pinatay din si Judge Andres Cipriano ng bayan ng Aparri, Cagayan.