MANILA, Philippines - Pananatilihin umano sa puwesto si Presidente Gloria Macapagal Arroyo. Ito’y isang taktikang ipatutupad ng military at pulisya.
Ayon sa isang mapananaligang impormante, sa golf course sa Canlubang at Camp Aguinaldo isinasagawa ng “Golf Mafia” ang pagdedesisyon kung sino ang hihirangin para sa mga matataas na posisyon sa militar at pulisya.
Nangunguna umano sa alyansang ito ang Philippine Military Class ’78 kasama ang isang malakas at impluwensyal na tagasuporta.
Dahil dito, nababalewala umano ang mga senior official ng PMA Class 77 na walang koneksiyon ngunit mga kwalipikado para sa promosyon.
“Ang pagkakahirang ng Class 78 sa mga mahahalagang posisyon ay nagpapatunay na ang Oplan August Moon ay totoo. May mali talaga sa sistema. Ngayon ay gusto nila na kunin ang lahat ng matataas na posisyon,” ayon sa isang opisyal.
Ang “Oplan August Moon” ay isa umanong plano ng Class 78 upang kuhanin ang liderato ng militar at pulis upang hayaan si Pangulong Arroyo, na ka nilang honorary classmate, na manatili sa puwesto.
“Marami talagang naiwan at na-bypass na magagaling na officers. Hindi maiiwasan na magkagulo. Matagal ng problema ito ng mga opisyal, lalo na yung mga walang koneksyon,” ayon sa isang opisyal na kabilang sa Class 77.
Ang mga bagong pangyayari sa pulisya at military ay nagbunsod sa PMA Masikap Class 77 upang magmiting ng regular sa iba’t ibang lugar sa Metro Manila upang planuhin ang kanilang mga gagawin.
“Nararamdaman ng mga miyembro na may ma laking mangyayari sa mga susunod na linggo o buwan kung kaya’t naghahanda sila,” ayon sa isang opisyal ng military na kabilang sa ibang PMA Class ngunit sumusuporta sa Class 77.
Ang isa sa mga dahilan ng miting ay upang ipakita ang kanilang suporta kay Lt. Gen. Raymundo Ferrer na umangal sa pagkakahirang kay Major Gen. Reynaldo Mapagu bilang Army chief. Si Ferrer ay isang malakas na kandidato para sa posisyon.
Nilinaw ni Ferrer, na itinalagang administrador nang ideklara ang martial law sa Maguindanao, na hindi niya kinukwestiyon ang karapatan ni Pangulong Arroyo sa pagtatalaga ng mga opisyal. Ngunit naniniwala ang mga kaklase ni Ferrer na siya ay nadismaya sa pagkakahirang kay Mapagu.
Ang mga miyembro ng Class 77 ay nasa mga sensitibong posisyon sa military at pulis. Si Ferrer ng Class 77 ay isang heneral sa Army na kilala sa kanyang “peace-building efforts” sa Mindanao.
Bago pa makuha ng Class 78 ang mga posisyon, pinilit ng Class 77 na maipuwesto ang kanilang mga kaklase sa mga mahahalagang posisyon sa military at pulis.
Ayon sa isang opisyal ng pulis, sinisira ng Class 78 ang tradisyon ng PMA at gumagawa ng gulo sa pulis at military.
Si Nacionalista Party standard-bearer Senator Manuel Villar ay isang “adopted member” ng Class 77. (Ricky Tulipat)