MANILA, Philippines - Dahil sa problema at bagsak na buwis sa Bureau of Customs, maaring matanggal sa puwesto si Customs Commissioner Boy Morales.
Ito ang sinabi ni House Oversight Committee Chairman at Rep. Danilo Suarez na nagdiing dapat nang magbitiw sa tungkulin si Morales tulad ng ginawa ni BIR Commissioner Sixto Esquivias IV, na kusang umalis sa puwesto matapos hindi makuha ang target revenue collection.
Sinabi ni Suarez kailangan humarap si Morales sa Attrition Board para linawin kung bakit bagsak ng P28 billion ang short fall ng koleksyon ng kanyang tanggapan.
Ipinagtataka ni Suarez kung bakit hindi nakuha ng kawanihan ang tamang buwis dahil hindi naman aniya tumigil ang importasyon ng langis sa bansa kaya dapat nakakolekta na ito ng husto. (Butch Quejada)