MANILA, Philippines – May 59 website sa internet ang kasalukuyang ginagapang ng National Bureau of Investigation para matukoy kung sino ang nag-upload dito ng sex video ng aktres na si Katrina Halili at ng cosmetic surgeon na si Dr. Hayden Kho.
Sinabi ng isang impormante sa NBI na nakikipag-ugnayan sila sa may-ari o operator ng naturang website para matunton ang unang naglabas ng sex video sa internet.
Kasabay nito, hiniling kahapon ni Katrina sa Department of Justice na isama sa demandang nauna niyang isinampa laban kay Kho ang dati nitong nobyang cosmetic surgeon na si Dr. Vicki Belo at kaibigan nitong si Eric Chua at isang Herbert Rosario dahil sa paniniwala ng aktres na may kinalaman ang tatlo sa pagkalat sa internet ng sex video na kinunan nang lingid sa kanyang kaalaman noong magkarelasyon pa sila ni Kho.
Ayon pa sa impormante sa NBI, nagpatulong na sila sa US-based website host upang mabuksan ang log system at matukoy ang responsable sa initial na uploading sa pamamagitan ng pagkuha ng IP address ng mga sangkot. (Ludy Bermudo at Gemma Garcia)