MANILA, Philippines – Mamamanhikan na si Sen. Mar Roxas sa long-time girlfriend na si Korina Sanchez sa darating na Sabado.
Inihayag kahapon ni Roxas na pormal na niyang hihingin ang kamay ni Korina sa mga kamag-anak nito upang maitakda na ang kanilang kasal.
Sisiguraduhin din umano niya sa mga kamag-anakan ni Korina na ma mahalin niya ito “kahapon, ngayon at hanggang bukas”.
Nagbiro pa si Roxas na ipagdasal siya para hindi mabulol habang hinihingi ang kamay ni Korina.
Anya, matagal na ang relasyon nila ni Korina at siguradong hindi naman ito ang dahilan kung bakit biglang tumaas siya sa pinakahuling survey ng Pulse Asia.
Hindi naman umano mababaw ang pananaw ng mga Pinoy para ibase lamang sa relasyon nila ni Korina ang pagsuporta sa kanya.
“Sa palagay ko hindi naman ganun kababaw ang mga kababayan natin. Siguro nakita nila ang laman ng aking puso at sinuklian nila ito ng dagdag na tiwala para sa atin,” sabi ni Roxas.
Nakapagtala ng limang porsiyentong pagtaas sa hanay ng mga presidentiables si Roxas na aminadong tatakbong presidente sa 2010. (Malou Escudero)