MANILA, Philippines - Nilinaw ni dating konsehal at ngayon ay Secretary to the Vice Mayor Isko Moreno na si Bernie Ang sa lahat ng mga kapulisan sa Maynila na bawal hulihin ang tong-its, mahjong at domino dahil hindi naman ito itinuturing na sugal.
Ayon kay Ang na siya ring may akda ng ordinansa sa gambling na anumang laro sa baraha tulad ng tong-its, mahjong, domino, pusoy at pusoy dos na ginagamitan ng isip o utak para laruin ay hindi sugal, ito ay ‘game of skill’ tulad ng chess, scrabble at iba pang popular boardgame.
Nilinaw ni Ang na ang mga sugal na lucky nine, black jack at cara y cruz ang itinuturing na illegal dahil ito ay game of chance o inaasa lamang sa swerte ang panalo dahil walang human mind intervention dito. Kabilang pa sa game of chance na maituturing ay ang karera, sabong, video karera at fruit games.
Kaugnay pa nito, binigyang babala din ni Ang ang lahat ng mga kapulisan sa Maynila na kung saka ling makakaakto naman sila ng mga nagsusugal na mayroong may nakalagay o nakadisplay na pera sa ibabaw ng mesa o sa harapan ng baraha ay ito na lamang ang kunin at hindi dapat idamay ang pera sa bulsa at wallet ng mga manunugal.
Ito ayon kay Ang ay isang maling krimen na maituturing at maaaring balikan ng kasong qualified theft ang mga awtoridad na posibleng mauwi sa kanilang pagkakasibak sa trabaho at pagkabilanggo. (Doris Franche)