Umaabot sa 395 ang pulis na lalaki ang nakasuhan noong nakaraang taon sa pananakit at ibang pang-aabuso at pagpapabaya sa sarili nilang asawa o kinakasamang babae at mga anak.
Dahil dito, ipinamamadali ni Philippine National Police Chief Director General Jesus Verzosa sa PNP Women’s and Children’s Complaint Desk ang pagresolba ng mga kasong naisampa sa tanggapan nito laban sa lahat ng uri ng ‘domestic violence’ dahil nakakaapetko ito sa performance at nawawalan ng disiplina bilang mga tagapagpatupad ng batas ang naturang mga pulis.
Base sa statistics na ipinalabas kahapon ng PNP-WCCD sa kaso ng ‘domestic violence’ na naisampa sa nasabing tanggapan mula Enero 1 hanggang Disyembre 31, 2008, umaabot sa 285 pulis ang inireklamong nagpabaya o umabandona at hindi sumuporta sa kanilang pamilya.
May mga pulis na hindi na umuuwi sa kanilang mga tahanan sa iba’t ibang kadahilanan tulad ng napalayo ng destino at overtime sa trabaho.
Ang iba naman ay may iba nang babae o kinakasama kaya tinalikuran ang tungkulin sa lehitimong pamilya.
May 22 namang pulis ang inireklamo ng sexual abuse.
Napuna rin sa rekord na marami sa mga inireklamo ng kani-kanilang asawa ay mga bagitong pulis o yaong may ranggong Police Officer 1 o Police Officer 2 o 3.
Kabilang pa sa mga itinuturing na ‘domestic violence’ ng PNP-WCCD ay ang pagiging immoral, pambababae, illegal detention, at sikolohiyang pang-aabuso.