Isang resolusyon ang nakatakdang ipalabas ng Manila City Council na magpapahintulot sa sinuman lalo na ang media na buklatin at tingnan ang nilalaman ng mga police blotter.
Ipinaliwanag ni Manila Vice Mayor Isko Moreno na ang police blotter ay isang public document na dapat na laging bukas sa sinumang nangangailangan nito kabilang na ang mga mamamahayag.
Sinabi ni Moreno na ang pagtatago ng police blotter ay indikasyon ng pagtatago ng isang krimen at pang-aabuso sa karapatan ng ibang tao.
Aniya, dehado dito ang mga mahihirap na nais na makuha ang hustisya sa krimen na kinasasangkutan ng kanilang mga pamilya.
“Kapag makapangyarihan ang inirereklamo ng isang maliit na tao, napakadali na lang gawin na hindi ito irekord o di kaya ay baligtarin ang tunay na pangyayari,” ani Moreno.
Gayunman, humingi kahapon ng paumanhin si PNP Chief Jesus Verzosa sa pagpapalabas niya ng memorandum hinggil sa police blotter.
Hiningi ni Verzosa ang pang-unawa ng mediamen matapos na makipagdiyalogo ang mga opisyal ng PNP kahapon sa Camp Crame kina National Press Club President Benny Antiporda; Maloli Espinosa, president ng Kapisanan ng mga Broadcasters sa Pilipinas, legal counsel ng KBP na si Atty. Rejie Jularbal at Volunteers Against Crime and Corruption na kinatawan ni Dante Jimenez.
Sinabi ni Verzosa na irerebisa nila ang pinagtatalunang memorandum at magsasagawa rin ng buwanang konsultasyon sa organisasyon ng media. (Doris Franche at Joy Cantos)