Namatay kahapon sa atake sa puso si Commission on Elections (Comelec) Commissioner Romeo Brawner, 72, habang naka-confine sa St. Lukes Medical Center sa Quezon City.
Sa pahayag ng anak ni Brawner na si Army Lt. Col. Romeo Brawner Jr., binawian ng buhay ang commissioner dakong alas 9:30 ng umaga matapos na atakehin sa puso dakong alas-6 ng umaga kahapon.
Nabatid na nagpacheck-up noong Lunes si Brawner subalit dahil na rin sa payo ng mga doctor ay minabuti na lamang na i-confine ito matapos mabahala ang doktor sa umano’y resulta ng mga medical test nito.
Agad namang nakiramay si Pangulong Arroyo sa pagpanaw ni Brawner na tinawag niyang “man of integrity”.
Si Brawner ay naging acting Comelec Chairman matapos ang pagreretiro ni Commissioner Resurreccion Borra hanggang manungkulan bilang Comelec Chairman si Jose Melo noong Marso 25, 2008.
Dahil sa pagpanaw ni Brawner ay tatlo na ang bakanteng posisyon sa Comelec matapos na magretiro sina Borra at Comm. Florentino Tuason Jr.
Naulila ni Brawner ang kanyang asawa na si Fe at limang anak. Ipinanganak si Brawner noong Sept. 17, 1935 sa Solano, Nueva Vizcaya. (Doris Franche/Rudy Andal)