Nagbanta kahapon ang isang malaking grupo ng mga maralitang taga-lungsod na magdaraos sila ng mas malaking rally katulad ng “people power” kapag hindi sineryoso ng Malacañang ang pagbusisi sa mga anomalya sa National Power Corporation na dahilan kung bakit nagbabadyang tumaas ang halaga ng kuryente.
“Siyasatin ang mga anomalya sa National Power Corporation,” Ito ang panawagan sa Malakanyang ng grupo ng mga mararalita na nagtungo sa tanggapan ng NAPOCOR sa Quezon City para ihayag ang kanilang galit.
Kinondena ng grupo ang anila’y talamak na katiwalian sa NAPOCOR katulad ng “overpriced” na halaga ng coal at iba pang pagsasamantala ng mga mataas na opisyal ng ahensya. “Iyan ang dahilan kung bakit nagdurusa ang mamamayan sa mataas na presyo ng elektrisidad,” anang grupong Alternatibong Kilusan Tungo sa Iisang Bayan at COALition. Ang mga katiwalian sa loob ng ahensiya ang isa sa mga dahilan kung bakit biglang tumaas ng 67 sentimo ang buwanang bayad sa kuryente.
Malaking scam anila ang pagbili ng karbon (coal) ng Napocor na panggatong ng ilang power plant sa bansa tulad ng Masinloc at Pagbilao power plant sa Luzon.
Nagwarning ang grupo na mas malalaki pang kilos-protesta ang idaraos nila hindi lang sa NAPOCOR kundi sa ibang ahensya ng pamahalaan kapag hindi naresolba ang problema sa halaga ng kuryente bunga ng katiwalian. (Angie dela Cruz)