Pagbabago, pulitiko at boto ang sentro ng Lenten message ng Simbahang Katolika.
Nabatid kay Dipolog Bishop Jose Manguiran, dapat na baguhin na ng mga pulitiko ang pagbili ng boto at pagbebenta ng boto ng publiko.
Ipinaliwanag ni Manguiran, ang bentahan at bilihan ng boto ay nagiging hadlang para sa maayos at tapat na gobyerno.
Sa ngayon aniya, ang pamahalaan ay hindi na napamumunuan ng maayos. Puno ng korupsiyon ang lahat mula publiko hanggang opisyal ng pamahalaan.
Kasabay nito, hiniling din ni Manguiran sa mga tao na ingatan ang kapaligiran dahil dito nabubuhay ang lahat.
Sinabi naman ni Manila Archbishop Gaudencio Cardinal Rosales, taun-taon naman ipinagdiriwang ang Kuwaresma upang bigyan ng pagkakataon ang bawat isa na baguhin at magsisi sa mga pagkakamali.
Ito rin ang pagkakataon ng bawat isa na mas maging malapit sa Diyos upang makamit natin ang tunay na kapayapaan. (Doris Franche)