Ibinasura ng Malacañang ang panukala ni House Speaker Jose de Venecia na bigyan ng amenstiya ang lahat ng itinuturing na kaaway ng estado.
Ayon kay Press Secretary at Presidential Spokesman Ignacio Bunye, ipinauubaya ni Pangulong Gloria Macapagal-Arroyo sa mga korte ang pagdedesisyon sa mga kaso ng mga itinuturing ni de Venecia na “enemies of the state.”
Ginawa ni Bunye ang paglilinaw kaugnay sa plano ni de Venecia na maghain ng panukalang batas na magbibigay ng amnestiya sa lahat ng “enemies of the state” kabilang si dating Pangulong Joseph Estrada at ang rebeldeng sundalo na naging senador na si Antonio Trillanes IV.
Sa Kongreso, sinabi ni Cebu Rep. Antonio Cuenco na hindi dapat batikusin ng publiko ang mungkahi ni de Venecia dahil legal at naaayon sa batas ang pagbibigay ng kapatawaran sa mga taong nagkasala sa pamahalaan. Sa Senado, nagpahayag ng paniniwala si Sen. Francis Escudero na pinaghahandaan na ng Malacañang ang nalalapit na “guilty verdict” kay Estrada kaya biglang isinulong sa Mababang Kapulungan ng Kongreso ang “Amnesty Bill” upang bigyang pag-asa at payapain ang mga loyalista ng dating Pangulo.
Sinabi ni Escudero na malaki ang posibilidad na may kaugnayan ang panukalang pagbibigay ng amnestiya para sa mga tinatawag na enemy of the state sa ilalabas na sentensiya laban kay Estrada. (Rudy Andal, Butch Quejada at Malou Escudero)