Ayon kay Philippine Ambassador Masanga Umpa sa Nigeria, ang mga pinalaya ay sina Joseph Viloria Doctolero at Pacifico Gajo. Nasa pangangalaga ngayon ito ng ating embahada sa Abujah, Nigeria makaraang palayain ng kanilang abductors bandang 3 p.m. noong Linggo sa pamamagitan ng pakikipag-negosasyon ng Petroleum Geo-Services at Nigeria authorities.
Nanindigan naman si Foreign Affairs spokesman Gilbert Asuque na pinalaya ang 2 Pinoy worker na walang ransom na ibinayad sa kanilang mga abductors. Inaasahan namang makakauwi sa bansa sa linggong ito ang 2 Pinoy.
Magugunita na dinukot ang dalawang Pinoy habang sila ay nasa pantalan ng Hardcourt sa Niger Delta ng may anim na armadong kalalakihan na hinihinalang mga pirata.
Bukod sa 2 Pinoy, umabot na rin sa 27 oil workers ang mga dinukot sa Niger Delta ng mga militanteng grupo dito upang hilinging kapalit ang mga naaresto nilang kasamahan. (Ellen Fernando)