Pinasisilip ng mga empleyado ng Department of Public Works and Highways (DWPH) ang umano’y kuwestiyunableng transaksiyong pinasok ng isang opisyal nito kaugnay sa isang proyekto sa lalawigan ng Rizal. Sa ipinarating na reklamo ng mga DPWH employees na tumangging magpabanggit ng pangalan, nadiskubre ng internal audit ng ahensiya na mayroon umanong anomalya sa transaksiyon ni Rizal District Engr. Oscar dela Cruz kaugnay sa P9.59 milyong improvement at rehabilitation ng Ampid river control sa San Mateo, Rizal at P9.59 milyong rehabilitasyon ng Teresa river sa Teresa, Rizal.
Binanggit ng mga empleyado sina "Ariel" at "Nanding" na umano’y namahala sa nasabing proyekto at kumolekta ng 15% mobilizaton fund.
Nakuha rin umano ni dela Cruz na idugtong ang DPWH project sa kalyeng ginawa naman ng provincial engineering office at pagkatapos ay siningil ang gobyerno sa buong kahabaan ng project.