2 testigo sa katiwalian sa AFP hawak ni Nene

Hiniling kahapon ni Senator Aquilino Pimentel kay Senate President Franklin Drilon na isailalim sa senate custody ang dalawang opisyal ng Phil. Marines dahil na rin sa banta sa kanilang buhay kaugnay ng kanilang nalalaman sa anomalya sa AFP.

Kasamang humarap ni Sen. Pimentel sa media sina Marine Capt. Danilo Luna at Capt. Ury Pesigan na humingi ng tulong kay Drilon upang isama ang mga ito sa pagtestigo ng mga junior officers sa gaganaping imbestigasyon ng committee of the whole sa Huwebes kaugnay ng Makati siege.

Sinabi ni Pimentel na ang dalawang opisyal ng Marines ay walang kaugnay sa nabigong mutiny at hindi rin sila AWOL.

Aniya, nangangamba lamang ang dalawang opisyal na isangkot sila sa sinasabing pag-aalsa dahil mayroon silang nalalaman sa mga ipinahayag na pagkadismaya ng mga young officers sa nagaganap na anomalya sa AFP. (Ulat ni Rudy Andal)