Suspensyon ng warrant of arrest sa MILF leaders ok sa Malacañang

Upang ganap na maisulong ang nakabiting negosasyong pangkapayapaan ng gobyerno at Moro Islamic Liberation Front (MILF), pormal na inihayag ni Pangulong Gloria Macapagal-Arroyo na bukas ang pamahalaan sa suspensyon ng warrant of arrest laban sa mga lider ng nasabing rebeldeng grupo.

Sa talumpati ng Pangulo kahapon sa ika-27 pangkalahatang pulong ng Catholic Bishops Conference of the Phils. (CBCP), sinabi nito na ang nasabing hakbangin ay isang paraan para magtiwala ang MILF sa prosesong pangkapayapaan na inilatag ng gobyerno.

Gayunman, kailangan aniya na huwag nang pabagalin pa ng MILF ang pagsisimula ng negosasyon sa pagkuwestyon sa mga isyung may kinalaman sa proseso ng pulong.

Maraming abogado at tagapayong legal, anang Pangulo ang MILF na kumukuwestiyon sa mga isyung may kinalaman sa proseso ng negosasyon.

Ang anunsyo ng Pangulo ay kasunod sa naging pahayag ng MILF na hindi sila makikipag-usap sa gobyerno hanggang hindi tinatanggal ang pagsisilbi ng arrest warrant sa kanilang mga matataas na lider na sina MILF Chairman Hashim Salamat; Ghazali Jaafar, MILF Vice Chairman for Political Affairs; Murad Ebrahim, Vice Chairman for Military Affairs; Alih Mumbantas, Vice Chairman for Internal Affairs at MILF spokesman Eid Kabalu. (Ulat ni Lilia Tolentino)