2 Pangulo ng employees association ng TESDA kinasuhan

Sinampahan kahapon ng kasong libelo sa Quezon City Prosecutor’s Office ni Technical Education Skills and Development Authority (TESDA) Director General Dante Liban ang dalawang Presidente ng TESDA employees association dahil sa paratang sa kanya na siya ay isang ‘corrupt’ official at umano’y sangkot sa maraming anomalya.

Ang mga kinasuhan ay sina Annie Geron at Sonia Lipio, Presidente ng Samahang Malaya at Magkakaisang Kawani ng TESDA at TESDA Association of Concerned Employees Union.

Bukod dito, sinampahan din ni Liban ng libelo ang pahayagang Tempo dahil sa aniya’y ginawang pakikipagkutsabahan kina Geron at Lipio noong Enero 18, 2003 na nagsasabing ang TESDA chief ay nagkaroon umano ng katiwalian at malversation ng pondo.

Inakusahan ang tanggapan ni Liban na sangkot sa anomalya ng pagbebenta ng Artist Record Book (ARB) at ‘payola’ scheme sa pagitan ng TESDA officials at testing center owners. (Ulat ni Angie dela Cruz)