Sinabi ni Zamora sa isang press conference na wala siyang tinatanggap na sasakyan mula kay Jimenez at ang sinasabi umanong Mitsubishi Space Wagon na paminsan-minsan niyang ginagamit ay pag-aari ng kanyang chief of staff na si Robert Delano.
Ipinakita pa ni Zamora sa mga mamamahayag ang rehistro ng sinasabing Space Wagon na ginagamit niya upang patunayan na pag-aari ito ng kanyang chief of staff.
Nakuha ni Delano ang nasabing Space Wagon sa pormang goodwill sa pinaglingkurang amo na si dating Compostela Valley Rep. Rogelio Sarmiento sa halagang P100,000 kung saan may nalalabi pang balanseng P20,000 noong 11th Congress.
Bagaman at isa umano siya sa pinakamahirap na kongresista, hindi pa rin nagbabago ang kanyang lifestyle at bisikleta pa rin ang madalas niyang sakyan papasok ng Batasan.
Magugunitang unang sumikat si Zamora sa kanyang mga kasamahang kongresista dahil sa paggamit ng bisikleta na may numerong 8 papasok sa trabaho.
Natigil ang paggamit niya nito ng makatanggap ng death threat dahil sa pagtutol niya sa pagmimina sa Compostela Valley.
Gayunman, inamin ni Zamora na totoong inalok siya ni MJ ng sasakyan noong isang taon matapos mapaulat na siya ang pinakamahirap na congressman ngunit hindi naman niya ito tinanggap. (Ulat ni Malou Escudero)