Sa 23-pahinang desisyon ng CA, pinatawan ng 17-taong pagkakulong dahil sa pagbibigay ng matitinding initiation sa biktima sina Fidelito Dizon at Artemio Villareal. Pinagbabayad din ang dalawa ng CA ng halagang P1 milyon at P50,000 bilang moral damages.
Samantala, ang mga akusadong sina Vincent Tecson; Junel Anthony Ama; Antonio Mariano Almeda at Renato Bantug Jr. ay pinarusahang mabilanggo ng 20-araw sa kasong slight physical injuries at pinagbabayad ng halagang P30,000 bilang danyos.
Batay sa rekord ng korte, ang insidente ay naganap noong February 1991 kung saan si Villa at mga kasamahang estudyante na sina Caesar Asuncion; Samuel Belleza; Bienvenido Marquez III; Roberto Navera; Geronimo Randy Recinto at Felix Sy, Jr. ay sumali sa hazing na isinagawa ng Aquila Legis Fraternity sa Almeda compound sa Caloocan City.
Ipinaliwanag ng CA na hindi dapat namatay si Villa kung hindi iginiit nina Dizon at Villareal na isailalim sa matinding initation rites ang mga biktima, partikular si Villa sa kabila ng pagpapahinto ni Nelson Victorino, ang head ng initiation rites ng nasabing grupo.
Bunga nito, ipinagharap ng kasong homicide ang 35-miyembro ng nasabing fraternity subalit 25 lamang dito ang naisailalim sa paglilitis ng Caloocan City Regional Trial Court sa sala ni Judge Adoracion Angeles. (Ulat ni Grace Amargo)