Sunog na sunog ang mga katawan ng mga biktima at halos di na makilala nang marekober ng mga nagresponding bumbero na kinilalang sina Civil Engineer Leo Dacarra at Architect Marion Monge, pawang nagmula sa Iriga Regional Office ng DPWH, nakatalaga sa International Bank and Rural Development Project na nakabase sa Metro Manila at stay-in employee sa DPWH-National Capital Region sa Chicago St., Port Area.
Sa ulat ni SFO4 Danilo Tanusan, ng Manila Fire Department, dakong alas-2:15 ng madaling-araw nang magsimulang mamataan ang makapal na usok sa quarters ng mga biktima sa ground floor ng Motorpool Section ng nasabing ahensya.
Sinabi ng ilang opisyal ng DPWH na posibleng faulty electrical wiring ang dahilan ng sunog.
Nabatid na mabilis na kumalat ang apoy na umano’y nagmula sa tinutuluyang magkakahiwalay na silid ng mga biktima. Hindi na nagawa pang makalabas ang mga ito matapos na ma-trap sa loob ng kanilang kuwarto at agad namang nadamay na kainin ng apoy ang ikalawang palapag ng gusali ng nasabing ahensya ng pamahalaan.
Nahirapan naman ang mga nagresponding pamatay sunog na agad na maapula ang apoy hanggang sa mahagip pa ang mga nakaparadang apat na kotse at isang owner type jeep.
Umabot sa ikalimang alarma ang sunog na tumagal ng halos isang oras.
Sinabi ng mga arson investigator na posibleng nagpumilit ang mga biktima na makalabas subalit hindi nila natagalan ang makapal na usok at ma-suffocate dahil sa narekober ng mga bumbero ang katawan ni Monge na nakatalukbong pa ng nasunog na kumot at may hawak na basang damit sa kanyang kuwarto at si Dacarra naman ay nakita sa loob ng banyo ng kanyang silid.
Tinatayang aabot sa mahigit P10 milyong halaga ng mga ari-arian at kasangkapan ang naabo habang inaalam pa ng mga opisyales ng DPWH kung may mga mahahalagang dokumento ng nasabing ahensya ang kasamang napinsala sa sunog.
Inaalam pa kung may foul play sa naturang insidente. (Ulat ni Andi Garcia)