CEBU, Philippines — Ang Benedicto College (BC) Cheetahs nagtinguha nga inaton ang labing nindot nilang sinugdanan ngadto sa 4-0 sa dihang ilang harongon ang Cebu Institute of Technology-University (CIT-U) Wildcats sa Cebu Schools Athletic Foundation, Inc. (CESAFI) Season 26 basketball tournament karong adlawa (Domingo, Septiyembre 20) sa Cebu Coliseum.
Magsugod ang ilang duwa sa alas-3:30 sa hapon.
Ang Cheetahs gikan sa 67-50 nga pagbugha sa University of Cebu (UC) Webmasters niadtong Septiembre 15 nga nagbitad kanila sa solong liderato sa college division uban ang perpektong 3-0 rekord.
Sa wala pa gipayaka ang Webmasters, ang Cheetahs mipakaging sa University of Southern Philippines Foundation (USPF) Panthers ug University of the Philippines (UP) Cebu Fighting Maroons.
Ang Cheetahs makig-atbang sa 2-1 Wildcats, nga naglaraw makabawi gikan sa miagi nilang kaparotan sa mga kamot sa University of Cebu Lapu-Lapu and Mandaue (UCLM).
Ang Wildcats miabli sa ilang kampanya uban ang sagunson nga daog batok sa University of San Jose-Recoletos (USJ-R) Jaguars ug UP Cebu Fighting Maroons sa wala pa giputol ang mainit nilang ratsada sa UCLM.
Sa laing collegiate matchup, ang UC Webmasters nanghinaut nga makarekober gikan sa ilang kapildihan batok sa Cheetahs sa dihang engkwentrohon nila ang USPF Panthers sa alas-5 sa hapon nga main game.
Ang Webmasters nagkupot karon og 3-1 nga baraga samtang ang Panthers 1-2.
Sa juniors division, ang five-peat champions Sacred Heart School-Ateneo de Cebu (SHS-AdC) Magis Eagles mosuway pagtali sa ikaduha nilang sunod-sunod nga daog sa dihang ilang harongon ang USPF Baby Panthers sa alas-2 sa hapon.
Ang Magis Eagles miarangkada sa ilang misyon nga mokab-ot og makasaysayanong double grand slam uban ang 61-56 nga pagpakaging sa University of the Visayas (UV) Baby Lancers sa miaging semana.
Samtang ang Baby Lancers buot nga makabangon sa sayo nilang pagkadagma sa dihang hamagon nilang nila ang 1-1 nga San Carlos School of Cebu (SCSC) Baby Warriors sa alas 12:30 sa hapon nga pasiunang duwa.
Vicelles, Tapales mosagubang og krusyal nga mga away gawas sa nasod
Ang mga Pinoy'ng boksidor nga sila si Mark “Rasta Mac” Vicelles ug Marlon “Nightmare” Tapales mopas-an og managlahing misyon sa dihang moaway sila gawas sa nasod karong Septiyembre 26.
Si Vicelles (21-2-1, 11 KOs) mohagit ni International Boxing Federation (IBF) light flyweight champion nga si Thanongsak Simsri (40-1, 35 KOs) sa Thailand didto sa Fujisan Messe Exhibition Hall sa Shizuoka, Japan.
Ang modaog nilang Vicelles ug Simsri obligado nga modepensa sunod sa iyang bakos batok kang Regie “Filipino Phenom” Suganob sa PMI Bohol Boxing Stable.
Si Suganob nahimong mandatory challenger human gi-knockout ang South African niyang karibal nga si Sivenathi Nontshinga sa ilang IBF title eliminator nga maoy main event sa “Kumong Bol-anon XXVI” niadtong Septiyembre 12 didto sa Bohol Wisdom School (BWS) Gymnasium sa dakbayan sa Tagbilaran.
Samtang si Tapales (41-5, 22 KOs) mohimo sa iyang debut sa featherweight class batok sa beteranong Thai nga si Nirun Baonok (15-33 11 KOs) didto sa Pattaya, Thailand.
Si JC Manangquil, ang promoter ug manedyir ni Tapales, nagkanayon nga usa kini ka dakong pagsulay alang ni Tapales sa iyang tinguha nga mahimong three-division world champion.
Ang 34-anyos nga si Tapales naghari kanhi sa World Boxing Organization (WBO) bantamweight ug International Boxing Federation (IBF) super bantamweight divisions..