CEBU, Philippines — Ang Cleveland Cavaliers milansang sa ika-10 nilang sagunson nga daog human gipayaka ang Charlotte Hornets, 115-105, sa ilang sangka sa NBA kagahapon didto sa Rocket Mortgage FieldHouse sa Cleveland, Ohio.
Si Darius Garland mikadlit og 25 puntos, si Jarrett Allen miamot og 19 puntos ug 11 ka rebounds samtang si Donovan Mitchell midugang og 19 puntos alang sa Cavs nga miinat sa labing nindot nga rekord ning season ngadto sa 31-4.
Didto sa Houston, si Jalen Green mipaulbo og 33 puntos samtang si Amen Thompson mitampo og 23 puntos ug 16 ka rebouds aron ituboy ang Rockets ngadto sa 119-115 nga pagpakaging ni LeBron James ug sa Los Angeles Lakers.
Dako sab og naambag si Fred VanVleet nga mihipos og 15 puntos alang sa Rockets.
Si Anthony Davis mitali og 22 sa iyang 30 puntos sa second half uban ang 13 ka rebounds. Si James mipupo og 21 puntos, 13 ka rebounds, ug siyam ka assists alang sa Lakers nga wala na makabangon pa sukad nalubong og 22 puntos sa first half.
Sa laing aksiyon, ang Sacamento Kings mibihag sa Golden State Warriors, 129-99, didto sa San Francisco.
Si Malik Monk maoy nangu sa Kings uban ang 26 puntos ug 12 ka assists samtang si Domantas Sabonis midonar og 22 puntos, 13 ka rebounds ug pito ka assists.
Si Stephen Curry mirehistro og 26 puntos sa pilderong Warriors.