Team ni Arquisola gikoronahang back-to-back champions
CEBU, Philippines — Ang Team C ni Jason Arquisola mibuntog sa Team A ni Chase Cokaliong, 88-85, aron pagpabiling kampiyon sa tinuig nga Chase Tower Runs (CTR) Liga Familia niadtong Martes, Disiembre 17, didto sa Cokaliong Tower basketball court. Si Miguel Gastador, nga gibansagan og 'Cebuano Rocket' tungod sa kataas niya og layat, maoy nangu sa Team C uban ang 22 puntos ug pito ka rebounds.
Midugang si Rendell Senining og 15 puntos, duha ka rebounds, upat ka assists, usa ka steal ug usa ka block, samtang sila si Froilan Mangubat ug Mark Panerio nagkumboya'g 27 puntos alang sa daogan nga kampo ubos sa pagtimon ni coach Paul Joven nga midonar og singko puntos, walo ka rebounds, upat ka assists ug usa ka steal.
Ang Team A maoy mitali sa nag-unang singko puntos sa duwa apan ang Team C miresbak dayon na ngadto sa pagkontrola sa duwa uban ang 41-30 nga bentaha sa tunga-tungang bahin sa ikaduha kuwarter
Na-ilog og balik sa Team A ang labaw, 73-71, human sa tulo ka kuwarter apan ang Team C mipakita og igong katakos aron pageskapo ngadto sa tres puntos nga kadaogan.
Si Jerome Napao miharos og 16 puntos ug 18 ka rebounds samtang si Dolan Adlawan miposte og 15 puntos, puntos, pito ka rebounds, usa ka assists ug duha ka blocks sa pilderong kawsa.
Sila si John Michael Abad ug Arc Gabriel Araw-araw nagkumboya'g 24 puntos apan nakawang ang ilang paningkamot sa Team A.
Sa sangka alang sa ikatulong dapit, si Jancork Cabahug mipabuhagay og 36 puntos ug milangkat og 20 ka rebounds sa bangis kaayong performance aron ituboy ang Team B ngadto sa 99-93 nga pagpayaka sa Team E.
Si Shane Menina mitimbre og 17 puntos, lima ka rebounds, upat ka assists ug upat ka steals, si Fletcher Galvez mi-iskor og 14 uban ang siyam ka rebounds, upat ka assits ug duha ka steals samtang si Iron Suano mitampo og 11 puntos, tulo ka rebounds, tulo ka assists ug duha ka steals sa Team B.
Si Ted Saga mitagak og 22 puntos, 21 ka rebounds, duha ka assists ug duha ka steals alang sa Team E. Si JM Tumabang mikadlit og 17 puntos samtang sila si Acer Go ug Giovanni Padillo nagkumboya'g 29 puntos apan parehong nangahoyhoy ang ilang abaga.