USJ-R Baby Jaguars abante sab sa Visayas Finals
CEBU, Philippines — Ang University of Southern Philippines Foundation (USPF) Panthers nakalingkawas sa University of San Jose-Recoletos (USJ-R) Baby Jaguars sud sa overtime, 76-74, aron langkaton ang kampiyonato sa Khalifa Cup:National Basketball Training Center (NBTC) Cebu Local Qualifying Tournament niadtong Dominggo, Disiembre 15, didto sa Recoletos Coliseum sa USJ-R Basak Campus.
Nagdanga-danga na unta sa kapildihan ang Panthers sa dihang ang Baby Jaguars namawi human maalkansi og nuybes puntos sa sayong bahin sa ikatulong kuwarter aron ilogon ang labaw, 66-64, sa basket ni Jan Francis Petilos sa nahibilin nga 24 segundos sa regulasyon.
Apan si Luke Dy sa USPF mipasud sa krusyal niyang itsa sa nahibilin nga 6.7 segundos aron itukmod ang duwa ngadto sa singko minutos nga ekstensiyon.
Si Clark Candia sa Baby Jaguars mitali sa nag-unang singko puntos sa dugang oras apan si Sebastian Versoza sa USPF kalit nga nangmangtas ug miposa og duha ka sagunson nga 3-pointers sa wala pa sila si Dy ug Marcus Lozano misalida aron ituboy ang Panthers ngadto sa makutas ug kulbahinam nga kadaogan.
Ang big man nga si Fritz Gonzales maoy nangu sa Panthers uban ang 21 puntos hinungdan sa pagbayaw kaniyang MVP. Gikuyogan siya sa Mythical 5 sa iyang mga teammates nga sila si Dy ug Versosa ug Jan Vince Oringo ug J Lord Pepito sa USJ-R.
Sila si Dy ug Verzosa nagkumbinar og 23 puntos sa dihang ang Panthers ni coach Alan Cabatingan miangkon og luna sa NBTC Visayas Regional Championship 2025 nga gikatakda karong Pebrero 12-16 didto sa Bacolod Tay Tung High School gym sa Bacolod City. Si Oringo mihipos og 19 puntos, si Pepito mi-iskor og 13 samtang sila si Candia ug Kyle Barrieta nagkumboya'g 23 puntos alang sa Baby Jaguars, nga miabante sa NBTC Visayas Finals sa pagtapos nila isip first runner-up.
Si NBTC Cebu LQT commissioner Atty. Francis Tolibas nagkanayon nga ang Panthers ug ang Baby Jaguars makadawat og P150,000 nga subsidiya matag usa sa ila unyang pagkumbati sa Regionals duha ka bulan gikan karon.