CEBU, Philippines — Ang masaaron nga Sugbuanong rider nga si Christwil Villanueva gibati og tumang kalipay sa talagsaon niyang kasinatian sa bag-ohay pang natapos nga PT Thailand Grand Prix 2024 diin iyang nakahugoy-hugoy ang Amerikano niyang idolo ug bagger icon nga si James Rispoli. Ang 18-anyos nga si Villanueva ug si Rispoli, usa ka two-time American Motorcyclist Association (AMA) SuperSport champion, naglangkob sa mga mikuha og atensiyon sa mga fans atol sa Harley-Davidson Masterclass Trackday didto sa Pattaya Bira Circuit niadtong Oktubre 29.
Sa wala pa kini, si Villanueva mitambong sa Thai MotoGP didto sa Chang International Circuit sa Buriram ubos sa imbitasyon sa main sponsor niyang Harley-Davidson of Cebu aron siya makapupo sa gikinahanglan nilang kasinatian agig pangandam sa internasyonal niyang mga lumba sa umaabot.
"I so happy. It was a very fruitful, encouraging experience for me," matud pa ni Villanueva, nga gikoronahang overall champion sa 300cc category atol sa 2024 Petron Pirelli National Motorcycle Racing Championship didto sa Clark International Speedway sa Mabalacat, Pampanga duha ka semana pa lamang ang milabay. Gawas nga nakakolekta og mga mahinungdanong higayon, ang garbo sa dakbayan sa Talisay nakat-on sab og mga bilihong leksiyon nga iyang gikinahanglan aron pagpalambo sa iyang abilidad.
"I gained a lot of new lessons and techniques in international racing particularly on the rules and regulations to apply," dason pa ni Villanueva.
"I thank Lord God for giving me all these blessings," dugang pa niya. "To my parents especially my father (Wilson) who is beside me at all times, to my crew, and to my manager and sponsor boss Regan King of Harley-Davidson of Cebu and RDAK Powersports, I am extremely grateful for their wholehearted support."