CEBU, Philippines — Sigurado ng makakuha og medalya sa nagpadayong Paris Olympics si Aira Villegas human niya gipukan sa kulbahinam niyang pakigsangka batok sa hometown favorite sa France nga si Wassila Lkhadiri sa 50kg quarterfinal bout kagahapon adlaw nga Domingo (oras sa Pilipinas).
Dili sayon para kang Villegas ang maong tahas tungod kay nakigsangka siya atubangan sa naglabing French audiences nga nanan-aw aron pag-abiba sa ilang atleta nga si Lkhadiri.
Apan bisan pa niini, nakuha ni Villegas ang mga hurado nga mihatag kaniya og split decision nga kadaogan.
Human sa iyang duwa, si Villegas mitug-an nga nadasig siya sa maong sangka para mga kaubanan niyang mga boksidor nga napakyas pag-abante sa medal rounds sa nanglabay nga mga adlaw.
“Inaalay ko rin po ito sa mga kasamahan ko, lalo na kay Eumir [Marcial] and kay Carlo [Paalam] kanina, so parang nalungkot ako kasi,” tug-an pa sa 29- anyos nga si Villegas sa interbyu kaniya nga gipatik sa One Sports.
“Sabi ko, gagawin ko na lang siyang motivation para ibawi yung kasamahan ko.”
Una nang nanamilit silang Marcial ug Paalam, kinsa parehong nakabitbit og medalya sa nakalabay nga Tokyo Olympics tulo ka tuig na ang nakalabay.
Karong Agosto 7, adlaw nga Miyerkules atubangon ni Villegas sa final round ang Turkish nga si Buse Naz Cakiroglu.