CEBU, Philippines — Ang garbo sa mga Pinoy nga si Carlos Yulo napakyas sa iyang misyon nga makalabni og medalya sa men’s all-around sa gymnastics competition sa Paris Olympics.
Kini human ang reigning Asian all-around champion mitapos lamang sa ika-12 nga puwesto bitbit ang iskor nga 83.032.
Si Oka Shinnosuke sa Japan maoy mibulsa sa gold medal uban ang iskor nga 86.832. Ang mga pambato sa China nga sila si Zhang Boheng ug Xiao Ruoteng ang mipugnit sa silver ug bronze sa iskor nga 86.599 ug 86.364.
Naapektuhan og maayo si Yulo sa dili maayo niyang sinudanan diin siya nangiwit human sa Rotation 1 uban ang iskor nga 11.900.
Duna pa hinooy duha ka tsansa si Yulo nga makamedalya.
Mokumbati siya sa laing duha ka finals sa men’s floor exercise ug men’s vault karong Agosto 3.