CEBU, Philippines — Laing Pinoy nga boksidor ang misaka sa trono isip world champion. Kini human ang top-ranked challenger nga si Pedro "Kid Pedro Heneral" Taduran gikan sa Libon, Albay mi-TKO sa kanhi way pildeng Hapon nga kampiyon nga si Ginjiro Shigeoka aron sakmiton ang International Boxing Federation (IBF) minimumweight title niadtong Dominggo, Hulyo 28, didto sa Shiga Daihatsu Arena sa Otsu City, Japan.
Gawas nga miinat sa iyang rekord ngadto sa 17-4-1 nga gidayan-dayanan na karon og 13KOs, si Taduran miangkon sab og balik sa korona sa IBF nga kanhi niya gikuptan sud sa duha ka tuig gikan niadtong 2019 ngadto sa 2021.
Naghimo kini ni Taduran nga ikaduhang Pinoy world champion sa kasamtangan sunod ni Melvin "El Gringo" Jerusalem sa Bukidnon, nga maoy nagbitbit sa World Boxing Council (WBC) nga bersiyon sa 105-pound belt.
Sa iyang bahin, si Shigeoka nakatilaw sa kapait sa kapildihan sa unang higayon sud sa 12 ka away uban ang 9KOs.