CEBU, Philippines — Gihatagan ni Pinoy gymnast Carlos Yulo ang iyang kaugalingon og tsansa nga makadaog og daghang medalya sa Paris Olympics.
Kini human ang 24-anyos nga si Yulo mi-abante sa finals sa tulo ka mga events sa gymnastics.
Kini mao ang all-around, floor exercise, ug vault.
Human sa tulo ka subdibisyon, si Yulo nalandig sa ikaunom nga puwesto sa all-around rankings uban ang iskor nga 83.631 nga naghatag kaniya og luna sa medal round diin 24 ka buok ang mikwalipikar.
Nakasud sab siya sa pinal nga hugna sa floor exercise diin siya ikaduha bitbit ang iskor nga 14.766 ingon man sa vault diin siya ikaunom uban ang iskor nga 14.683.
Ang Top 8 lamang sa matag apparatus ang nakabira og ticket sa final.
Sa una niyang pagkumbati sa Olympics didto sa Tokyo tulo ka tuig na ang milabay, si Yulo nakasud lamang sa usa ka final diin siya hapit maka-medalya human mitapos sa ikaupat nga dapit sa vault.
Ning higayona, mitaas ang tsansa ni Yulo nga makakubit og medalya alang sa nasud.