CEBU, Philippines — Gipangulohan ni two-time NBA Most Valuable Player Giannis Antetokounmpo ang nasud niyang Greece pag-angkon og luna sa giatngan nga Paris Olympics.
Ang superstar sa Milwaukee Bucks impresibong namawi gikan sa mabugnaw nga sinugdanan aron pag-iskor og 23 puntos sa 80-69 nga kadaogan sa Greece batok sa Croatia didto sa Piraeus.
Tungod niini, ang Greece mi-abante ngadto sa Paris Games nga gikatakdang mosikad karong Hulyo 26 didto sa France.
Gawas sa Greece, ang Brazil, Spain ug Puerto Rico milukat sab og ticket alang sa prestihiyosong torneyo nga mahitabo lamang kausa sud sa upat ka tuig.
Ang Brazil milampaso sa Latvia, 94-69, didto sa Riga, ang Spain mipayaka sa Bahamas, 86-78, didto sa Valencia, samtang ang Puerto Rico mipakurat sa Lithuania, 79-68, didto sa San Juan.
Sa Olympics basketball nga duwaon didto sa Lille, ang Greece ug Spain mokumbati ubos sa Group A uban ang Australia ug Canada.
Ang Brazil anaa sa Group B diin ilang makasangka ang France, Germany ug Japan.
Samtang Puerto Rico nabutang sa Group C uban ang Team USA, South Sudan, ug Serbia.