CEBU, Philippines — Sa labing unang higayon sa kasaysayan sa "Kumong Bol-anon", mo-away ang usa Hapon nga boksidor.
Siya mao si Kai Ishizawa (11-3, 10KOs), nga gitakdang manulong sa Tagbilaran City, Bohol karong Abril 30 aron hagiton si World Boxing Organization (WBO) Global light flyweight champion Regie "The Filipino Phenom" Suganob (14-1, 4KOs) sa main event sa "Kumong Bol-anon 15" sa PMI Bohol Boxing Promotions.
Mao kini ang gipahibawo sa big boss sa PMI Boxing nga si Atty. Floriezyl Echavez Podot atol sa usa ka press conference kagahapon didto sa PMI Bohol-Main Campus sa Tagbilaran nga gitambongan mismo ni Ishizawa pinaagi sa Zoom.
"In choosing Ishizawa, seguro yung desire namin na makalaban ang mga Japanese fighters. We try to bring excitement to our fans na dito sa Bohol gaganapin ang laban. A different perspective that not all the time Filipinos fight in Japan. It's time for Filipinos to fight in their own soil," matud pa ni Podot.
Si Podot nagpasalamat ni international matchmaker Edito Villamor, nga kanhi two-time world title challenger atol sa mabulokon niyang panahon uban sa ALA Gym, sa pagkumbinsi niini sa Hapon nga dawaton ang ilang tanyag.
"It involved financial consideration, we have to offer a competitive purse," tug-an pa ni Podot. Midugang si Podot nga usa kini ka malisud nga hagit nga kinanghanglan labyan ni Suganob ilabi na sa sentimento karon sa mga Pinoy fans nga nadismaya tungod sa sagunson nga kapakyasan nga nahiaguman sa ilang mga kababayan sa kamot sa mga Hapon ilang karibal.
"There's the grudge against the Japanese fighters because of the number of Filipinos losing lately," padayon pa ni Podot . "Regie will be weighed by the eye of the Filipino boxing fans, how he will be able to do his job."
Mao kini ang unang higayon nga si Suganob manalipod sa trono nga iyang naangkon human gibuntog si Venezuelan Ronald Chacon pinaagi sa unanimous decision sud sa 12 ka hugna niadtong Nobiembre 4 sa miaging tuig didto sa Bohol Wisdom School gym sa Tagbilaran.
Usa kini ka dalaygon nga pagbalik sa garbo sa Dauis, Bohol human napakyas pinaagi sa 12-round unanimous verdict ngadto ni IBF 108-pound champion Sivenathi Nontshinga sa una niyang world title fight niadtoing Hulyo 2, 2023 didto sa International Convention Center sa East London, South Africa.
"Nindot ning duwaa kay first time nato makakontra og Japanese," paambit pa ni Suganob, nga rated No.3 sa WBO, No.9 sa WBC, ug No.6 sa IBF. "Daghan magpaabot ani kay kasagaran sa mga Pinoy nangapilde sa Japan. Nag-expect gyud makadaog ta, paningkamotan sad nato makadaog ta ani. Importante sab ni nga fight basin makaduwa ta balik og world title."
Sa iyang bahin, ang 27-anyos nga si Ishizawa wala gibati og kahadlok bisan og mokumbati siya sa tertiryo sa iyang kontra.
"I'm looking forward to the title match in Bohol, Philippines. I'm very excited and I will prepare hard for this fight," batbat pa ni Ishizawa, nga misuway pagbira sa WBO minimumweight belt apan gipatikangkang sa ika-11 nga hugna sa kababayan niyang si asataka Tanaguchi duha ka tuig na ang milabay didto sa makasaysyanong Korakuen Hall isa Tokyo, Japan.
"Filipino boxers are very powerful. They're very good fighters, speedy and powerful. But if even if it's Regie's hometown, I would like to end the fight with a knockout win," dugang pa ni Ishizawa.