CEBU, Philippines — Inubanan sa usa ka masipang buto, ang Rhea Gullas Cup 1st District of Cebu Inter-City/Municipality Sports Festival 2024 malampusong misikad kagahapong adlawa didto sa Enan Chiong Activity Center sa dakbayan sa Naga, habagatang bahin sa Sugbo.
Sa wala pa pormal nga gideklara ang pagbukas sa torneyo, si kongresista sa Rhea Mae Aquino Gullas mipahinumdum sa tanang mga atleta gikan sa unang distrito sa Sugbo nga gilangkoban sa mga siyudad sa Talisay, Naga, ug Carcar ug mga lungsod sa Minglanilla, San Fernando, ug Sibonga nga gamiton ang hinatag sa Ginoo nilang mga talento nga hagdanan ngadto sa pagkatkat sa kalamposan nga ilang gipangandoy sa kinabuhi.
"Use your talent to get a better future for you and for your family, that is the ultimate goal of the Gullas Cup," matud pa ni Gullas atol sa bonggang seremonyas sa pagbukas nga gitambongan sab nilang mayor Valdemar Chiong sa Naga ug Lionel Bacaltos sa Sibonga.
Dugang niini, si Gullas mapasigarbuhon nga ang tinuig nilang paugnat sa kusog nahimong mas dako ug mas nindot diin miabot na ngadto sa pito ka mga events ang kumbatihan ning higayona.
Gawas sa basketball ug volleyball, banatan sab ang football, chess, table tennis, push bike, badminton, lawn tennis, ug amateur boxing ning edisyon sa Gullas Cup.
Sa laing bahin, si Jhesidy Thea Alberca sa Sidlak Carcar maoy gikoronahang Miss Gullas Cup 2024. Si Maria Adriana Prusak sa Abante Minglanilla gibayaw nga first runner-up, samtang si Julia Jamaica Offergeld sa Naga ang second runner-up.