CEBU, Philippines — Ang mga boksidor sa ARQ Stable ug Omega Gym miharos og kulata sa tagsa-tagsa nila ka mga kontra atol sa "Kumbati 15" nga promosyon nga misikad sa makasaysayanon nilang panag-alyansa niadtong Sabado sa gabii didto sa Tuburan Sports Complex sa Tuburan, Cebu.
Sa main event, si Benny "The Bull" Canete (9-1, 6KOs) sa Omega milampos pinaagi sa majority decision batok ni Jun "The Blaze" Blazo human sa 10 ka hugna nilang kumbati ubos sa bantamweight division.
Sila si Mark "Rasta Mac" Vicelles ug Ramil Roda mihimo sab og kisaw.
Si Vicelles (18-1-1, 11KOs) mipa-undang ni Ronald Alapormina sa ikatulong hugna samtang si Roda (2-1) milupig ni Kier Torregosa pinaagi sa unanimous decision sud sa upat ka hugna nilang binukbukay.
Wala magpa-alkansi, ang mga pambato sa ARQ nga gipangulohan ni Ian Paul Abne mikuha sab og atensiyon.
Si Abne, manghud ni OPBF Silver flyweight champion April Jay Abne, mibuntog ni Jeven Villacite pinaagi sa unanimous decision aron inaton ang perpekto niyang rekord ngadto sa 10-0 uban ang 4KOs.
Ang mga katropa niyang si Berland Robles, Rodel Wenceslao, Ramil Macado Jr., ug Riel Gabunilas nagmadaogon sab.
Si Robles mikastigo ni Renoel Pael aron pagpabiling way pilde sa 10 ka away uban ang 4KOs, samtang si Wenceslao mipatikangkang ni Ryan Maano sa ikatulong hugna aron isaka ang iyang baraha ngadto sa 20-19-2 uban ang 9KOs.
Sa laing dalaygon nga salida, si Macado mipasurender ni Mike Kinaadman sa wala pa magsugod ang ikaduhang hugna aron iduso ang way tatsa niyang marka ngadto sa 8-0 uban ang 4KOs samtang si Gabunilas, manghud ni WBO Youth light flyweight champion John Paul Gabunilas, midaog sa ikatulong sagunson nga higayon pinaagi sa unanimous decision batok ni Rustom Sario.
Sa laing sangka, ang Hapon nga si Kakeru Mashimo midispatsa ni Marjun Piencenaves sa ikaduhang hugna aron bitaron ang limpiyo niyang baraha ngadto sa 6-0 uban ang 5KOs.